BREITHIÚNAS NA CÚIRTE (an Chéad Dlísheomra)
3 Meán Fómhair 2026 (*)
(Tarchur chun réamhrialú – Daoine aonair a chosaint i dtaca le próiseáil sonraí pearsanta – Rialachán (AE) 2016/679 – Airteagal 5 – Prionsabail a bhaineann le próiseáil sonraí pearsanta – Airteagal 6 – Dlíthiúlacht na próiseála sonraí – Dlí na gCuideachtaí – Treoir (AE) 2017/1132 – Airteagal 14 – Doiciméid agus sonraí atá le nochtadh – An coincheap ‘daoine a bhfuil baint acu le riarachán, maoirseacht nó rialú cuideachta’ – Sonraí pearsanta a bhaineann le scairshealbhóirí cuideachtaí poiblí teoranta a chur ar fáil don phobal – Scairshealbhóirí mionlaigh)
I gCás C‑798/24 [Jautiva] (i),
IARRAIDH ar réamhrialú faoi Airteagal 267 CFAE, ó Satversmes tiesa (an Chúirt Bhunreachtúil, an Laitvia), trí bhreith an 14 Samhain 2024, a fuarthas ag an gCúirt an 19 Samhain 2024, sna himeachtaí
A agus páirtithe eile,
páirtí eile sna himeachtaí:
Latvijas Republikas Saeima,
tugann AN CHÚIRT (an Chéad Dlísheomra),
agus í comhdhéanta mar seo a leanas: F. Biltgen, Uachtarán Dlísheomra, T. von Danwitz (Rapóirtéir), Leas-Uachtarán na Cúirte, A. Kumin, S. Gervasoni agus M. Bošnjak, Breithiúna,
Abhcóide Ginearálta: R. Norkus,
Cláraitheoir: A. Calot Escobar,
ag féachaint don nós imeachta i scríbhinn,
tar éis breithniú a dhéanamh ar na barúlacha arna dtíolacadh thar ceann na bpáirtithe seo a leanas:
– A agus páirtithe eile, ag L. Liepa, advokāts,
– Rialtas na Laitvia, ag J. Davidoviča agus K. Pommere, i gcáil Gníomhairí,
– Rialtas na Polainne, ag B. Majczyna, i gcáil Gníomhaire,
– Rialtas na Fionlainne, ag A. Laine, i gcáil Gníomhaire,
– Rialtas na Sualainne, ag C. Meyer-Seitz, i gcáil Gníomhaire,
– Rialtas na hIorua, ag K. E. M. Skjelland agus B. Stankovic, i gcáil Gníomhairí,
– Parlaimint na hEorpa, ag G. Corstens, M. Migliorati agus L. Ruppeka-Rupeika, i gcáil Gníomhairí,
– Comhairle an Aontais Eorpaigh, ag L. Bergere, N. Coghlan agus A.-L. Meyer, i gcáil Gníomhairí,
– an Coimisiún Eorpach, ag A. Bouchagiar, H. Kranenborg, I. Naglis agus M. Noll-Ehlers, i gcáil Gníomhairí,
tar éis éisteacht le Tuairim an Abhcóide Ghinearálta ag éisteacht an 18 Nollaig 2025,
an Breithiúnas seo a leanas:
Breithiúnas
1 Baineann an iarraidh ar réamhrialú, ar thaobh amháin, le léiriú Airteagal 14(d)(ii) de Threoir (AE) 2017/1132 ó Pharlaimint na hEorpa agus ón gComhairle an 14 Meitheamh 2017 maidir le gnéithe áirithe de dhlí na gcuideachtaí (IO 2017 L 169, lch. 46), arna leasú le Treoir (AE) 2019/1151 ó Pharlaimint na hEorpa agus ón gComhairle an 20 Meitheamh 2019 (IO 2019 L 186, lch. 80) (‘Treoir 2017/1132’), agus le bailíocht na forála sin i bhfianaise Airteagail 7 agus 8 den Chairt um Chearta Bunúsacha an Aontais Eorpaigh (‘an Chairt’), agus, ar an taobh eile, le léiriú Airteagal 5(1) de Rialachán (AE) 2016/679 ó Pharlaimint na hEorpa agus ón gComhairle an 27 Aibreán 2016 maidir le daoine nádúrtha a chosaint i ndáil le sonraí pearsanta a phróiseáil agus maidir le saorghluaiseacht sonraí den sórt sin, agus lena n‑aisghairtear Treoir 95/46/CE (an Rialachán Ginearálta maidir le Cosaint Sonraí) (IO 2016 L 119, lch. 1, ‘RGCS’).
2 Rinneadh an iarraidh sin i gcomhthéacs gearán bunreachtúil arna thaisceadh ag daoine nádúrtha i gcoinne chomhoiriúnacht na reachtaíochta náisiúnta le Latvijas Republikas Satversme (Bunreacht Phoblacht na Laitvia) lena gceanglaítear sonraí pearsanta a bhaineann le scairshealbhóirí cuideachtaí poiblí faoi dhliteanas teoranta a chur ar fáil don phobal.
An dlí lena mbaineann
Dlí an Aontais Eorpaigh
An Chairt
3 Foráiltear mar seo a leanas in Airteagal 7, dar teideal ‘Meas ar an saol príobháideach agus ar shaol an teaghlaigh’:
‘Tá ag gach duine an ceart go ndéanfar a shaol nó a saol príobháideach agus a shaol nó a saol teaghlaigh, a chónaí nó a cónaí agus a chumarsáidí nó a cumarsáidí a urramú.’
4 Foráiltear le hAirteagal 8 den Chairt, dar teideal ‘Cosaint sonraí pearsanta’:
‘1. Tá ag gach duine an ceart go ndéanfar na sonraí pearsanta a bhaineann leis a chosaint.
2. Ní mór sonraí den sórt sin a phróiseáil go cóir ar mhaithe le cuspóirí sonracha agus ar bhonn thoiliú an duine i dtrácht nó ar bhonn dlisteanach éigin eile arna leagan síos le dlí. Tá ag gach duine an ceart chun rochtain a fháil ar shonraí atá bailithe agus a bhaineann leis nó léi, agus an ceart go ndéanfar na sonraí sin a cheartú.
3. Beidh comhlíonadh na rialacha sin faoi réir a rialaithe ag údarás neamhspleách.’
5 Foráiltear mar seo a leanas le hAirteagal 52(1) den Chairt, dar teideal ‘Raon feidhme agus léiriú na gceart agus na bprionsabal’:
‘Ní mór foráil le dlí d’aon teorannú ar fheidhmiú na gceart agus na saoirsí arna n‑aithint sa Chairt seo agus ní mór inneachar sár-riachtanach na gceart agus na saoirsí sin a urramú. Faoi réir phrionsabal na comhréireachta, ní fhéadfar teorainneacha a dhéanamh ach amháin má tá gá leo agus má fhreagraíonn siad iarbhír do chuspóirí leasa ghinearálta arna n‑aithint ag an Aontas nó don riachtanas cearta agus saoirsí daoine eile a chosaint.’
RGCS
6 Luaitear an méid seo a leanas in aithrisí 1 agus 10 de RGCS:
‘(1) Ceart bunúsach is ea cosaint daoine nádúrtha i ndáil le próiseáil sonraí pearsanta. In Airteagal 8(1) den [Chairt] agus in Airteagal 16(1) den [CFAE] déantar foráil go bhfuil ag gach duine an ceart go ndéanfar na sonraí pearsanta a bhaineann leis a chosaint.
[...]
(10) Chun leibhéal comhsheasmhach cosanta agus ardleibhéal cosanta a áirithiú do dhaoine nádúrtha agus chun na bacainní ar shreabhadh sonraí pearsanta laistigh den Aontas a bhaint, ba cheart an leibhéal céanna cosanta a bheith i ngach Ballstát do chearta agus saoirsí daoine nádúrtha i ndáil le próiseáil sonraí den sórt sin. Ba cheart a áirithiú go gcuirtear na rialacha maidir le cosaint ceart bunúsach agus saoirsí bunúsacha daoine nádúrtha i bhfeidhm go comhsheasmhach agus go haonchineálach ar fud an Aontais i ndáil le sonraí pearsanta a phróiseáil. [...]’
7 De réir Airteagal 1(2) de, cosnaíonn RGCS cearta agus saoirsí bunúsacha daoine nádúrtha, agus go háirithe a gceart go ndéanfar sonraí pearsanta a chosaint.
8 Mar a leagtar amach in Airteagal 2(1), tá feidhm ag RGCS maidir le sonraí pearsanta a phróiseáil go hiomlán nó go páirteach trí mhodhanna uathoibrithe, agus maidir le sonraí pearsanta, ar cuid de chóras comhdúcháin iad nó atá beartaithe a bheith ina gcuid de chóras comhdúcháin, a phróiseáil trí mhodhanna eile seachas modhanna uathoibrithe.
9 Foráiltear mar seo a leanas in Airteagal 4 de RGCS, dar teideal ‘Sainmhínithe’:
‘Chun críocha an Rialacháin seo, tá feidhm ag na sainmhínithe seo a leanas:
(1) ciallaíonn “sonraí pearsanta” aon fhaisnéis a bhaineann le duine nádúrtha sainaitheanta nó in‑sainaitheanta [...]; is é is “duine in‑sainaitheanta” ann duine is féidir a shainaithint, go díreach nó go hindíreach, go háirithe trí thagairt a dhéanamh d’aitheantóir amhail ainm, uimhir aitheantais, sonraí suímh, aitheantóir ar líne nó ceann amháin nó níos mó de thosca a bhaineann go sonrach le céannacht fhisiceach, fhiseolaíoch, ghéiniteach, mheabhrach, eacnamaíoch, chultúrtha nó shóisialta an duine nádúrtha sin’.
(2) ciallaíonn “próiseáil” aon oibríocht nó aon sraith d'oibríochtaí a dhéantar ar shonraí pearsanta nó ar shraitheanna de shonraí pearsanta, trí mhodhanna uathoibrithe nó trí mhodhanna eile, amhail bailiú, taifeadadh, eagrú, struchtúrú, stóráil, oiriúnú nó athrú, aisghabháil, ceadú, úsáid, nochtadh trí tharchur, trí scaipeadh nó trí chur ar fáil ar bhealach eile, ailíniú nó comhcheangal, srianadh, léirscriosadh nó díothú;
[...]’
10 Foráiltear in Airteagal 5(1) de RGCS, dar teideal ‘Prionsabail a bhaineann le próiseáil sonraí pearsanta’:
‘Maidir le sonraí pearsanta:
(a) déanfar iad a phróiseáil ar bhealach atá dleathach, cothrom agus trédhearcach i ndáil leis an ábhair sonraí (“dlíthiúlacht, cothroime agus trédhearcacht”);
(b) déanfar iad a bhailiú chun críocha sonraithe sainráite dlisteanacha agus ní dhéanfar iad a phróiseáil tuilleadh ar shlí atá ar neamhréir leis na críocha sin; tuilleadh próiseála a dhéantar ar shonraí pearsanta chun críocha cartlannú a dhéanamh ar mhaithe le leas an phobail, chun críocha taighde eolaíoch agus stairiúil nó chun críocha staidrimh, ní mheasfar, i gcomhréir le hAirteagal 89(1), go bhfuil sí ar neamhréir leis na críocha tosaigh (“teorannú de réir cuspóra”);
(c) beidh siad leormhaith, ábhartha agus teoranta don mhéid is gá maidir leis na críocha dá ndéantar iad a phróiseáil (“íoslaghdú sonraí”);
[...]’
11 Leagtar amach an méid seo a leanas in Airteagal 6(1) agus (3) de RGCS, dar teideal ‘Dlíthiúlacht na próiseála sonraí’:
‘1. Ní bheidh an phróiseáil dleathach ach amháin má tá feidhm, agus a mhéid atá feidhm, le ceann díobh seo a leanas ar a laghad:
(a) tá toiliú tugtha ag an ábhar sonraí a shonraí pearsanta nó a sonraí pearsanta a phróiseáil chun ceann amháin nó níos mó de chríocha sonracha;
[...]
(c) is gá an phróiseáil a dhéanamh chun oibleagáid dhlíthiúil a bhfuil an rialaitheoir faoina réir a chomhlíonadh;
[...]
3. Déanfar an bunús don phróiseáil dá dtagraítear i bpointe (c) agus i bpointe (e) de mhír 1 a leagan síos leis méid seo a leanas:
(a) dlí an Aontais; nó
(b) dlí Ballstáit a bhfuil an rialaitheoir faoina réir.
Cinnfear críoch na próiseála sa bhunús dlí sin nó, maidir leis an bpróiseáil dá dtagraítear i bpointe (e) de mhír 1, beidh ga léi le haghaidh cúram chur i gcrích a dhéantar ar mhaithe le leas an phobail nó i bhfeidhmiú údaráis oifigiúil atá dílsithe don rialaitheoir. Féadfaidh forálacha sonracha a bheith sa bhunús dlí sin chun cur i bhfeidhm rialacha an Rialacháin seo a oiriúnú, inter alia: Féadfaidh forálacha sonracha a bheith sa bhunús dlí sin chun cur i bhfeidhm rialacha an Rialacháin seo a oiriúnú, lena n‑áirítear na coinníollacha ginearálta lena rialaítear dlíthiúlacht na próiseála sonraí ag an rialaitheoir; [na] cineálacha sonraí atá faoi réir a bpróiseála; na hábhair sonraí lena mbaineann; na heintitis a bhféadfar na sonraí pearsanta a nochtadh dóibh agus na críocha ar chucu a bhféadfar iad a nochtadh dóibh; an teorannú de réir cuspóra; tréimhsí stórála; agus oibríochtaí próiseála agus nósanna imeachta próiseála, lena n‑áirítear bearta chun próiseáil dhleathach agus chothrom a áirithiú, amhail iad sin do staideanna sonracha próiseála eile dá bhforáiltear i gCaibidil IX. Comhlíonfaidh dlí an Aontais nó dlí Ballstáit cuspóir a bhaineann le leas an phobail agus beidh sé i gcomhréir leis an aidhm dhleathach atá á saothrú.’
Treoir 2017/1132
12 Foráiltear don mhéid seo a leanas le haithrisí 7 agus 8 de Threoir 2017/1132:
‘(7) Tá tábhacht speisialta, go háirithe chun leasanna tríú páirtithe a chosaint, ag baint le comhordú forálacha náisiúnta maidir le nochtadh, le bailíocht oibleagáidí lenar ghlac cuideachtaí faoi theorainn scaireanna nó atá faoi dhliteanas teoranta ar shlí eile, agus le neamhniú na gcuideachtaí sin.
(8) Ba cheart doiciméid bhunúsacha cuideachta a nochtadh chun go bhfeadfaidh tríú páirtithe a bheith ar an eolas faoina bhfuil iontu agus faoi fhaisnéis eile a bhaineann leis an gcuideachta, go háirithe sonraí faoi na daoine atá údaraithe ceangal a chur ar chuideachta.’
13 De réir Airteagal 1 den Treoir sin, dar teideal ‘Ábhar’:
‘Sa Treoir seo, leagtar síos bearta maidir leis an méid seo a leanas:
– comhordú a dhéanamh ar na coimircí a éilíonn Ballstáit ar chuideachtaí de réir bhrí an dara mír d’Airteagal 54 den Chonradh, ionas go gcosnófar leasanna comhaltaí agus daoine eile, i leith foirmiú cuideachtaí poiblí faoi dhliteanas teoranta agus cothabháil agus athrú a gcaipitil, d'fhonn na coimircí sin a chomhionannú,
– comhordú a dhéanamh ar choimircí a éilíonn Ballstáit ar chuideachtaí de réir bhrí an dara mír d’Airteagal 54 den Chonradh, ionas go gcosnófar leasanna comhaltaí agus tríú páirtithe, i leith nochtadh, bailíocht oibleagáidí lenar ghlac cuideachtaí faoi theorainn scaireanna nó atá faoi dhliteanas teoranta ar shlí eile, agus neamhniú na gcuideachtaí sin, d'fhonn na coimircí sin a chomhionannú,
[...]’
14 Foráiltear le hAirteagal 4 den Treoir sin, dar teideal ‘Faisnéis éigeantach atá le soláthar sna reachtanna nó sna hionstraimí corpraithe nó i ndoiciméid ar leithligh’, an méid seo a leanas:
‘Beidh an fhaisnéis seo a leanas ar a laghad le feiceáil sna reachtanna nó san ionstraim chorpraithe nó i ndoiciméad ar leithligh a fhoilsítear i gcomhréir leis an nós imeachta a leagtar síos i ndlíthe gach Ballstáit i gcomhréir le hAirteagal 16:
[...]
(i) céannacht na ndaoine nádúrtha nó dlítheanacha nó na gcuideachtaí nó na ngnólachtaí a shínigh, nó ar ina n‑ainm a síníodh, na reachtanna nó an ionstraim chorpraithe, nó i gcás nár foirmíodh an chuideachta ag an am céanna, na dréachtaí de na doiciméid sin.;
[…]’
15 Foráiltear le hAirteagal 13 den Treoir sin, dar teideal ‘Raon feidhme’:
‘Beidh feidhm ag na bearta comhordaithe dá bhforbraítear leis an Roinn seo agus le Roinn 1A maidir le forálacha reachtaíochta, rialúcháin agus riaracháin na mBallstát a bhaineann leis na cineálacha cuideachta a liostaítear in Iarscríbhinn II, agus i gcás ina sonrófar sin, a bhaineann leis na cineálacha cuideachtaí a liostaítear in Iarscríbhinn I agus in Iarscríbhinn IIA.’
16 In Iarscríbhinn II a ghabhann le Treoir 2017/1132, ina liostaítear na cineálacha cuideachtaí dá dtagraítear, inter alia, in Airteagal 13 den Treoir sin, tagraítear, i gcás na Laitvia, do ‘akciju sabiedrība, sabiedrība ar ierobežotu atbildību, komanditsabiedrība’, is é sin le rá, cuideachtaí poiblí faoi dhliteanas teoranta, cuideachtaí príobháideacha faoi dhliteanas teoranta agus comhpháirtíochtaí faoi theorainn scaireanna.
17 Foráiltear le hAirteagal 14 den Treoir sin, dar teideal ‘Doiciméid agus sonraí a bheidh le nochtadh’:
‘Déanfaidh na Ballstáit na bearta is gá chun a áirithiú go ndéanfaidh cuideachtaí na doiciméid agus na sonraí seo a leanas ar a laghad a nochtadh go héigeantach:
(a) an ionstraim chomhdhéanaimh, agus na reachtanna más in ionstraim ar leithligh atá siad;
[...]
(d) ceapadh, foirceannadh oifige agus sonraí na ndaoine, mar chomhlacht a bunaíodh de bhun an dlí nó mar chomhaltaí d’aon chomhlacht den sórt sin, ar fíor an méid seo a leanas ina leith:
(i) tá siad údaraithe ionadaíocht a dhéanamh don chuideachta agus iad ag déileáil le tríú páirtithe agus in imeachtaí dlíthiúla; beidh sé soiléir ón nochtadh an féidir leis na daoine dá n‑údaraítear ionadaíocht a dhéanamh thar ceann na cuideachta a bheith mar ionadaithe ina n‑aonar nó an bhfuil sé de cheangal orthu gníomhú go comhpháirteach;
(ii) glacann siad páirt i riar, i maoirseacht nó i rialú na cuideachta;
[...]’
18 Foráiltear le hAirteagal 16(3) den Treoir sin mar a leanas:
‘Áiritheoidh na Ballstáit go ndéanfar na doiciméid agus an fhaisnéis dá dtagraítear in Airteagal 14 a nochtadh trína gcur ar fáil go poiblí sa [chlár lárnach, tráchtála nó cuideachtaí]. [...]’
19 Baineann Airteagal 64(3) agus Airteagal 95(2) den Treoir sin le hoibleagáidí chomhlacht riaracháin nó bainistíochta na cuideachta i leith an chruinnithe ghinearálta, faoi seach, i ndáil le cúnamh airgeadais arna dheonú ag cuideachta chun a scaireanna dílse a fháil ag tríú páirtí agus i ndáil le cumaisc trí éadáil.
Treoir 2015/849
20 Sonraítear in Airteagail 11 agus 13 de Threoir (AE) 2015/849 ó Pharlaimint na hEorpa agus ón gComhairle an 20 Bealtaine 2015 maidir le cosc a chur le húsáid an chórais airgeadais chun críoch sciúrtha airgid agus maoinithe sceimhlitheoireachta, lena leasaítear Rialachán (AE) Uimh. 648/2012 ó Pharlaimint na hEorpa agus ón gComhairle, agus lena n‑aisghairtear Treoir 2005/60/CE ó Pharlaimint na hEorpa agus ón gComhairle agus Treoir 2006/70/CE ón gCoimisiún (IO 2015 L 141, lch. 73), arna leasú le Treoir (AE) 2024/1640 ó Pharlaimint na hEorpa agus ón gComhairle an 31 Bealtaine 2024 (IO L, 2024/1640) (‘Treoir 2015/849’), an dícheall cuí do chustaiméirí atá le déanamh ag eintitis faoi oibleagáid.
21 Foráiltear le hAirteagal 30(5) de Threoir 2015/849:
‘Áiritheoidh na Ballstáit go mbeidh an fhaisnéis maidir leis an úinéireacht thairbhiúil inrochtana i ngach cás:
[...]
(c) aon duine nó eagraíocht ar féidir leis leas dlisteanach a thaispeáint.
Ceadófar do na daoine nó do na heagraíochtaí dá dtagraítear i bpointe (c) den chéad fhomhír rochtain a fháil ar a laghad ar ainm, mí agus bliain bhreithe agus tír chónaithe agus náisiúntacht an úinéara thairbhiúil chomh maith le cineál agus méid an leasa thairbhiúil a shealbhaítear.’
Dlí na Laitvia
Bunreacht Phoblacht na Laitvia
22 Cumhdaítear in Airteagal 96 de Bhunreacht Phoblacht na Laitvia, inter alia, an ceart go n‑urramófaí an saol príobháideach. De réir chásdlí an Satversmes tiesa (an Chúirt Bhunreachtúil, an Laitvia), baineann raon feidhme an Airteagail sin le cosaint sonraí pearsanta.
Cód Tráchtála
23 Foráiltear i bpointí 3 agus 4 d'Airteagal 8(3) den Komerclikums (Cód Tráchtála), dar teideal ‘Ábhar na n‑iontrálacha sa chlár tráchtála’ mar seo a leanas:
‘(3) Tá an fhaisnéis a bhaineann le cuideachta chaipitiúil atá le hiontráil sa chlár tráchtála liostaithe thíos:
[...]
(3) an sloinne, an céadainm, an uimhir aitheantais phearsanta (in éagmais uimhir aitheantais phearsanta, dáta breithe, uimhir agus dáta eisiúna an doiciméid aitheantais, an tír agus an t‑údarás a d’eisigh an doiciméad sin) agus an post atá ag comhaltaí bhord bainistíochta na cuideachta caipitiúla agus comhaltaí an bhoird maoirseachta (i gcás ina bhfuil bord den sórt sin ag an gcuideachta chaipitiúil);
(4) cumhacht chomhaltaí an bhoird bainistíochta ceangal a chur ar an gcuideachta ina haonar nó i gcomhpháirt;
[...]’
24 Is mar seo a leanas atá an fhoclaíocht in Airteagal 12 den Chód sin, dar teideal ‘Foilsitheacht sa chlár tráchtála’:
‘(1) Féadfar brath ar iontrálacha sa Chlár Tráchtála amhail i gcoinne tríú páirtithe a luaithe a nochtfar iad. [...]
[...]’
25 Foráiltear le hAirteagal 235 den Chód sin, dar teideal ‘Faisnéis le hiontráil i gclár na scairshealbhóirí’:
‘(1) Léireofar i ngach iontráil i gclár na scairshealbhóirí ainm na cuideachta, an chláruimhir, an seoladh dlíthiúil agus, i gcás inarb infheidhme, faisnéis faoi cé acu atá nó nach bhfuil an chuideachta sin faoi réir imeachtaí leachtaithe nó dócmhainneachta, chomh maith le teideal an doiciméid ‘Iontráil i gclár na scairshealbhóirí’ agus beidh an fhaisnéis seo a leanas inti:
(1) uimhir thagartha agus dáta na hiontrála;
(2) uimhir thagartha an chlárúcháin, trí uimhriú leantach a úsáid ón gcéad iontráil i gclár na scairshealbhóirí;
(3) na huimhreacha tagartha a bhaineann leis na scaireanna;
(4) sonraí a bhaineann le scairshealbhóirí;
(a) i gcás duine nádúrtha, sloinne, céadainm, uimhir aitheantais phearsanta (in éagmais uimhir aitheantais phearsanta, dáta breithe, uimhir agus dáta eisiúna an doiciméid aitheantais, an tír agus an t‑údarás a d’eisigh an doiciméad sin) agus an seoladh ag ar féidir dul i dteagmháil leis an duine;
(b) i gcás daoine dlítheanacha agus comhpháirtíochtaí, an t‑ainm, an uimhir chlárúcháin agus an seoladh dlíthiúil;
(5) seoladh ríomhphoist an scairshealbhóra, má d’iarr an scairshealbhóir go n‑úsáidfeadh an chuideachta é chun cumarsáid a dhéanamh leis nó léi;
(6) aicme, líon agus luach ainmniúil scaireanna gach scairshealbhóra, agus líon na vótaí a ghabhann leo;
(7) an stádas a bhaineann le scaireanna a íoc;
(8) ionadaí comhpháirteach na scairshealbhóirí arna gceapadh i gcomhréir leis an nós imeachta a leagtar síos in Airteagal 157 den Chód seo, lena léirítear an fhaisnéis dá dtagraítear i bpointí 4 agus 5 de mhír 1 den Airteagal seo;
(9) faisnéis maidir le scaireanna a fuair an chuideachta féin, lena dtugtar cúiseanna lena bhfáil.
[...]’
26 Faoi Airteagal 268 den Chód sin, dar teideal ‘Cumhachtaí chruinniú ginearálta na scairshealbhóirí’:
‘(1) Ní bheidh sé de cheart ach ag cruinniú ginearálta na scairshealbhóirí cinntí a dhéanamh maidir leis na nithe seo a leanas:
(1) cuntais bhliantúla na cuideachta;
(2) brabúis ón mbliain airgeadais roimhe sin a úsáid;
(3) comhaltaí an bhoird maoirseachta, iniúchóirí agus leachtaitheoirí a thoghadh agus a bhriseadh as a bpost;
(4) caingean a thabhairt in aghaidh chomhaltaí an bhoird bainistíochta, an bhoird maoirseachta agus an iniúchóra, nó caingean den sórt sin a tharscaoileadh, agus ionadaí ar an gcuideachta a cheapadh chun gníomhaíochtaí a shaothrú in aghaidh chomhaltaí an bhoird maoirseachta;
[...]
(6) leasuithe ar airteagail chomhlachais na cuideachta;
(7) caipiteal a mhéadú nó a laghdú;
(8) eisiúint agus comhshó urrúis na cuideachta agus na taisclainne lárnaí urrús ina gcláraítear scaireanna dí-ábharaithe na cuideachta;
(9) luach saothair chomhaltaí an bhoird maoirseachta agus an iniúchóra a chinneadh;
(10) scor, leanúint, fionraí nó athnuachan ghníomhaíochtaí na cuideachta nó atheagrú na cuideachta;
(11) na prionsabail, cineálacha agus critéir ghinearálta chun luach saothair chomhaltaí na mbord bainistíochta agus maoirseachta a chinneadh;
(12) scaireanna cuideachta a chionroinnt ar fhostaithe agus ar chomhaltaí na mbord bainistíochta agus maoirseachta.
(2) Ní dhéanfaidh cruinniú ginearálta na scairshealbhóirí cinntí maidir le hábhair eile ach amháin má fhoráiltear dó sin leis an dlí.’
An Dlí maidir le Clár na gCuideachtaí
27 Is mar seo a leanas atá an fhoclaíocht in Airteagal 4.10(5) den likums ‘Par Latvijas Republikas Uzņēmumu reģistru’ (an Dlí maidir le Clár Fiontar Phoblacht na Laitvia), dar teideal ‘Ceart rochtana ar fhaisnéis i gClár na bhFiontar’:
‘Soláthrófar sa chlár gnó an fhaisnéis agus na doiciméid atá sa chuid phoiblí den sainchomhad clárúcháin (an chéad fhomhír d’Airteagal 4.15) saor in aisce i modh tarchurtha sonraí ar líne (lena n‑áirítear oll-íoslódáil).’
28 Foráiltear i bpointe 2 den chéad mhír d’Airteagal 4.11 den Dlí sin, dar teideal ‘Faisnéis atá le foilsiú ar shuíomh gréasáin chlár na ngnóthas’:
‘Áiritheoidh an clár gnó go mbeidh rochtain phoiblí ag úsáideoir gan aithint ar an bhfaisnéis is déanaí (is cothroime le dáta) seo a leanas ar a shuíomh gréasáin maidir le daoine dlítheanacha agus fíorais dhlíthiúla atá taifeadta sna cláir a choinníonn an clár gnó:
[...]
(2) faisnéis eile atá taifeadta sa chlár.’
29 Foráiltear le hAirteagal 4.15 den Dlí sin, dar teideal ‘Páirteanna poiblí agus neamhphoiblí den sainchomhad clárúcháin’ an méid seo a leanas:
‘Áireofar an méid seo a leanas sa chuid phoiblí den chomhad clárúcháin:
[...]
(2) faisnéis eile a iontráladh sa chlár:
[...]
(b) faisnéis ón iontráil i gclár scairshealbhóirí (comhaltaí) cuideachta caipitil maidir le scairshealbhóirí (comhaltaí) na cuideachta sin [...];
(3) na doiciméid seo a leanas ar cuid den chomhad clárúcháin iad:
(a) sa chlár tráchtála – [...] iontráil scairshealbhóirí (comhaltaí) sa chlár, [...].
Na doiciméid agus an fhaisnéis ar cuid den chomhad clárúcháin iad agus nach dtagraítear dóibh sa chéad mhír den Airteagal seo, áireofar iad sa chuid neamhphoiblí den chomhad clárúcháin.
I gcás inar tugadh stádas faisnéise srianta d’iontráil sa chlár nó d’fhaisnéis chláraithe nó ina bhfuil a hinfhaighteacht don phobal srianta le reachtaíocht, áireofar í sa chuid neamhphoiblí den chomhad clárúcháin.
Is faisnéis shrianta iad an fhaisnéis agus na doiciméid atá sa chuid neamhphoiblí den chomhad clárúcháin (míreanna 2 agus 3 den Airteagal seo), agus féadfaidh údaráis forfheidhmithe dlí iad a fháil chun na cúraimí a shonraítear i ndlíthe agus i rialacháin a chomhlíonadh, agus, gan srian, féadfaidh an Finanšu izlūkošanas dienests [(Aonad um Fhaisnéis Airgeadais] agus údaráis mhaoirseachta iad a fháil i réimse an sciúrtha airgid agus mhaoiniú na sceimhlitheoireachta agus an leata a chosc, agus ní mór do na húdaráis eile iarraidh réasúnaithe a chur isteach. Iarrfaidh daoine aonair an fhaisnéis agus na doiciméid atá sa chuid neamhphoiblí den chomhad clárúcháin i gcomhréir leis an nós imeachta chun faisnéis shrianta a iarraidh dá bhforáiltear in Informācijas atklātības likums [(an Dlí maidir le Saoráil Faisnéise)].’
An Dlí maidir le Sciúradh Airgid a Chosc
30 Foráiltear le hAirteagal 5.1(1) den Noziedzīgi iegūtu līdzekļu legalizācijas un terorisma un proliferācijas finansēšanas novēršanas likums (an Dlí maidir le sciúradh airgid agus maoiniú sceimhlitheoireachta agus iomadaithe a chosc, ‘an Dlí maidir le sciúradh airgid a chosc’), dar teideal ‘Inrochtaineacht na faisnéise is gá chun ceanglais an Dlí a chomhlíonadh, a dhíorthaítear ó chórais faisnéise Phoblacht na Laitvia’ an méid seo a leanas:
‘Chun a n-oibleagáidí faoin Dlí seo a chomhlíonadh, beidh eintitis faoi oibleagáid agus údaráis mhaoirseachta agus rialaithe i dteideal taifid agus faisnéis ar líne a iarraidh agus a fháil maidir le comhaltaí agus úinéirí tairbhiúla atá sna cláir a choinníonn clár cuideachtaí Phoblacht na Laitvia, an fhaisnéis sin a choinneáil agus a phróiseáil ar bhealach eile chun measúnú a dhéanamh ar shonraí a bhaineann leis an gcustaiméir agus lena chomhpháirtithe gnó agus ar an ngá atá le hidirbheart amhrasach a thuairisciú don Aonad um Fhaisnéis Airgeadais nó staonadh ó idirbheart den sórt sin a dhéanamh, chomh maith lena chinneadh ar tionscnaíodh imeachtaí dócmhainneachta in aghaidh daoine dlítheanacha nó imeachtaí cosanta dlíthiúla i ndáil leis an gcustaiméir.’
An Dlí maidir le Smachtbhannaí Idirnáisiúnta agus Náisiúnta
31 Foráiltear le hAirteagal 5 den Starptautisko un Latvijas Republikas nacionālo sankciju likums (an Dlí maidir le smachtbhannaí idirnáisiúnta agus náisiúnta Phoblacht na Laitvia; ‘an Dlí maidir le smachtbhannaí idirnáisiúnta agus náisiúnta’), dar teideal ‘Srianta airgeadais’:
‘I gcás ina bhforchuireann smachtbhannaí náisiúnta srianta airgeadais ar an duine atá faoi smachtbhannaí, ceanglófar ar gach duine, laistigh dá dhlínse, an méid seo a leanas a dhéanamh láithreach agus gan fógra a thabhairt roimh ré:
(1) reo a dhéanamh ar na cistí agus na hacmhainní eacnamaíocha uile atá, go díreach nó go hindíreach, faoi úinéireacht, i seilbh nó faoi rialú an duine atá faoi smachtbhannaí, go hiomlán nó go páirteach, lena n‑áirítear tríú páirtithe atá ag gníomhú thar ceann an duine sin nó faoina threoir;
(2) gan cistí agus acmhainní eacnamaíocha a chur ar fáil, go díreach nó go hindíreach, don duine atá faoi smachtbhannaí, lena n‑áirítear tríú páirtithe atá ag gníomhú thar ceann an duine sin, faoina threoir nó chun tairbhe an duine sin;
(3) gan seirbhísí airgeadais a sholáthar mar a chumhdaítear le smachtbhannaí náisiúnta don duine atá faoi smachtbhannaí, lena n‑áirítear do thríú páirtithe atá ag gníomhú thar a gceann, faoina stiúir nó chun a dtairbhe.’
An díospóid sna príomhimeachtaí agus na ceisteanna a tharchuirtear le haghaidh réamhrialú
32 Thug 17 nduine nádúrtha caingean os comhair an Satversmes tiesa (an Chúirt Bhunreachtúil), arb í an chúirt a rinne an tarchur í, ag iarraidh agóid a dhéanamh i gcoinne chomhoiriúnacht na reachtaíochta náisiúnta le hAirteagal 96 de Bhunreacht Phoblacht na Laitvia, lena ráthaítear an ceart go n‑urramófaí an saol príobháideach agus go gcosnófaí sonraí pearsanta, eadhon pointe 2(b) den chéad fhomhír d’Airteagal 4.15 den Dlí maidir le Clár na gCuideachtaí, arna léamh i gcomhar leis an gcúigiú fomhír d’Airteagal 4.10 den Dlí sin agus le hAirteagal 235(1) den Chód Tráchtála.
33 Faoin reachtaíocht sin, cuirtear faisnéis áirithe a bhaineann le scairshealbhóirí cuideachtaí poiblí faoi dhliteanas teoranta ar fáil don phobal. Más duine nádúrtha é an scairshealbhóir sin, áireofar san fhaisnéis sin ainm, sloinne, uimhir aitheantais phearsanta nó, in éagmais uimhir den sórt sin, dáta breithe, uimhir agus dáta eisiúna doiciméid aitheantais, an tír agus an t‑údarás eisiúna, agus an seoladh ag ar féidir teagmháil a dhéanamh leis an scairshealbhóir. Ina theannta sin, agus gan beann ar cibé acu is duine nádúrtha é an scairshealbhóir nó nach ea, áirítear san fhaisnéis sin freisin seoladh ríomhphoist an scairshealbhóra, i gcás inar iarr an scairshealbhóir go n‑úsáidfeadh an chuideachta ina bhfuil scaireanna aige í chun cumarsáid a dhéanamh leis, aicme, líon agus luach ainmniúil a scaireanna, agus líon na vótaí a ghabhann leo. Tá an fhaisnéis chéanna inrochtana ar líne agus is féidir í a íoslódáil ar an mórchóir, go háirithe ag aon úsáideoir gan aithint, dá bhforáiltear i bpointe 2 den chéad fhomhír d’Airteagal 4.11 den Dlí maidir leis an gclár gnó.
34 Is scairshealbhóirí mionlaigh i gcuideachta phoiblí theoranta iad na hiarratasóirí sna príomhimeachtaí. Maíonn siad nach ndearna reachtas na Laitvia scrúdú ná údar leis an ngá atá leis an bhfaisnéis lena mbaineann a nochtadh don phobal, agus é á chur san áireamh, tar éis a foilsithe, nach féidir aon srian a chur ar a húsáid ina dhiaidh sin agus go bhfuil baol mór ann go n‑úsáidfear í chun críocha mímhacánta. In aon chás, i bhfianaise bhreithiúnas an 22 Samhain 2022, Luxembourg Business Registers (C‑37/20 agus C‑601/20, EU:C:2022:912, ‘an breithiúnas in Luxembourg Business Registers’), tá nochtadh na faisnéise sin gan údar agus díréireach, ós rud é nach úinéirí tairbhiúla na cuideachta lena mbaineann ná comhaltaí dá comhlachtaí bainistíochta iad na hiarratasóirí sna príomhimeachtaí, agus nach bhfuil an ceart ná an fhéidearthacht acu rialú a fheidhmiú ar an gcuideachta sin.
35 I ndáil leis sin, fiafraíonn an chúirt a rinne an tarchur, ar thaobh amháin, an gceanglaítear foilsiú na sonraí pearsanta atá i gceist os a comhair faoi Threoir 2017/1132 agus, go háirithe, faoi Airteagal 14(d)(ii) di, ina dtagraítear do dhoiciméid nó d’fhaisnéis a bhaineann leis na daoine a bhfuil baint acu le riarachán, maoirseacht nó rialú na cuideachta. Dá mba amhlaidh an cás, measann an chúirt sin gur ghá bailíocht oibleagáide foilsithe den sórt sin a fhíorú i bhfianaise Airteagail 7 agus 8 den Chairt.
36 Ar an taobh eile, fiafraíonn an chúirt sin an bhféadfaidh Ballstát, gan forálacha RGCS, go háirithe Airteagal 5(1) de, agus forálacha na Cairte a shárú, oibleagáid den sórt sin a leagan síos ina dhlí náisiúnta chun cuspóirí a bhaint amach amhail na cuspóirí a chuir an Latvijas Republikas Saeima (Parlaimint na Laitvia) ar aghaidh, eadhon, ar an gcéad dul síos, timpeallacht ghnó thrédhearcach a áirithiú agus leasanna tríú páirtithe a chosaint, ar an dara dul síos, sciúradh airgid agus maoiniú sceimhlitheoireachta agus leathadh arm ollscriosta a chosc agus, ar an tríú dul síos, an fhaisnéis is gá a sholáthar chun smachtbhannaí náisiúnta, idirnáisiúnta agus smachtbhannaí an Aontais a chur chun feidhme. Sa chomhthéacs sin, tugann an chúirt a rinne an tarchur dá haire nach bhfuil rochtain ar na sonraí atá i gceist faoi réir aon choinníoll amhail, inter alia, leas dlisteanach a léiriú.
37 Sna himthosca sin, chinn an Satversmes tiesa (an Chúirt Bhunreachtúil) bac a chur ar na himeachtaí agus na ceisteanna seo a leanas a tharchur chuig an gCúirt Bhreithiúnais le haghaidh réamhrialú:
‘(1) An bhfuil coincheap na ndaoine “a ghlacann páirt i riar, i maoirseacht nó i rialú na cuideachta” a úsáidtear in Airteagal 14(d) de Threoir [2017/1132] le léiriú mar thagairt d’aon scairshealbhóir i gcuideachta phoiblí faoi dhliteanas teoranta, agus é mar thoradh air sin go bhfuil ceanglas ar Ballstát an fhaisnéis a bhaineann le gach scairshealbhóir a nochtadh agus é a chur ar fáil go poiblí sa chlár i gcomhréir le hAirteagal 16(3) de Threoir 2017/1132?
(2) Más freagra dearfach a thabharfar ar an gcéad cheist, an bhfuil Airteagal 14(d)(ii) de Threoir 2017/1132, a mhéid a cheanglaítear leis nochtadh sonraí maidir le gach scairshealbhóir i gcuideachta phoiblí theoranta, bailí i bhfianaise an chirt maidir le hurraim don saol príobháideach agus do shaol an teaghlaigh a ráthaítear le hAirteagal 7 den Chairt agus an ceart chun sonraí pearsanta a chosaint a ráthaítear le hAirteagal 8 de?
(3) An bhfuil Airteagal 5(1)(b) de [RGCS] le léiriú sa chaoi go bhféadfadh próiseáil sonraí phearsanta an scairshealbhóir i gcuideachta phoiblí theoranta, sa chéad áit, timpeallacht ghnó níos trédhearcaí a áirithiú agus chun leasanna tríú páirtithe a chosaint: sa dara háit, chun sciúradh airgid agus maoiniú sceimhlitheoireachta agus maoiniú leata a chosc: agus, sa tríú háit, an fhaisnéis is gá a sholáthar le haghaidh forfheidhmiú smachtbhannaí náisiúnta, idirnáisiúnta agus smachtbhannaí an Aontais Eorpaigh?
(4) An gceadaítear leis na prionsabail a leagtar amach in Airteagal 5(1) de [RGCS], reachtaíocht náisiúnta a bhunú, chun na gcríoch thuasluaite, faoinar féidir le haon duine sonraí pearsanta an scairshealbhóir i gcuideachta phoiblí theoranta a fháil gan oibleagáid a bheith orthu leas dlisteanach a léiriú maidir le sonraí den sórt sin a fháil?’
Na ceisteanna arna dtarchur le haghaidh réamhrialú
An chéad cheist
38 Lena céad cheist, fiafraíonn an chúirt a rinne an tarchur, go bunúsach, an bhfuil Airteagal 14(d) de Threoir 2017/1132 le léiriú sa chaoi go gceanglaítear leis faisnéis a fhoilsiú a bhaineann le scairshealbhóirí uile na gcuideachtaí a chumhdaítear leis an bhforáil sin, lena n‑áirítear scairshealbhóirí mionlaigh na gcuideachtaí sin.
39 Faoin bhforáil sin, a bhfuil feidhm aici maidir leis na cineálacha cuideachta dá dtagraítear in Airteagal 13 de Threoir 2017/1132, eadhon iad siúd a liostaítear go háirithe in Iarscríbhinn II a ghabhann léi, ní mór do na Ballstáit na bearta is gá a dhéanamh chun a áirithiú go nochtfaidh na cuideachtaí sin go héigeantach ar a laghad na doiciméid agus na sonraí a bhaineann le ceapadh, foirceannadh oifige agus sonraí na ndaoine a bhfuil sé de chumhacht acu, mar chomhlacht a fhorordaítear le dlí nó mar chomhaltaí de chomhlacht den sórt sin, ionadaíocht a dhéanamh don chuideachta agus iad ag déileáil le tríú páirtithe agus in imeachtaí dlíthiúla, nó a bhfuil baint acu le riar, maoirseacht nó rialú na cuideachta.
40 I ndáil leis sin, ba cheart a mheabhrú, de réir chásdlí socair na Cúirte, nach mór léiriú uathrialach agus aonfhoirmeach a thabhairt de ghnáth ar fud an Aontais Eorpaigh ar théarmaí forála de dhlí an Aontais nach ndéantar aon tagairt shainráite inti do dhlí na mBallstát chun brí agus raon feidhme na forála sin a chinneadh; ní mór a chur san áireamh sa léiriú sin ní hamháin a fhoclaíocht ach freisin an comhthéacs ina bhfuil sé agus na cuspóirí a shaothraítear leis na rialacha ar cuid díobh é (féach, chuige sin, breithiúnais an 18 Eanáir 1984, Ekro, 327/82, EU:C:1984:11, mír 11, agus an 18 Nollaig 2025, Slagelse Almennyttige Boligselskab, Afdeling Schackenborgvænge, C‑417/23, EU:C:2025:1017, mír 76).
41 Maidir le foclaíocht Airteagal 14(d) de Threoir 2017/1132, ba cheart a thabhairt faoi deara nach dtagraíonn an fhoráil sin go sainráite do scairshealbhóirí ná do chruinniú ginearálta na scairshealbhóirí. Ina theannta sin, tagraíonn an fhoráil sin do ‘cheapachán’, ‘foirceannadh oifige’ agus ‘céannacht’ daoine a bhfuil sé de chumhacht acu, mar chomhlacht dá bhforáiltear le dlí, nó mar chomhaltaí de chomhlacht den sórt sin, ionadaíocht a dhéanamh don chuideachta agus iad ag déileáil le tríú páirtithe agus in imeachtaí dlíthiúla agus/nó a ghlacann páirt i riar, i maoirseacht nó i rialú na cuideachta. Mar sin féin, mar a chuir Rialtais na Laitvia agus na Polainne, Parlaimint na hEorpa, Comhairle an Aontais Eorpaigh agus an Coimisiún Eorpach in iúl ina mbarúlacha i scríbhinn, ní dhéantar scairshealbhóirí cuideachta a cheapadh ná a chur as oifig. Eascraíonn a stádas as a sealbhú i gcaipiteal cuideachta amháin, eadhon a gceart úinéireachta i scaireanna arna n‑eisiúint ag an gcuideachta sin, agus tá sé éagsúil, i ndáil leis sin, le stádas na ndaoine a cheaptar chun suí ar chomhlachtaí riaracháin agus bainistíochta na cuideachta sin agus chun ionadaíocht a dhéanamh don chuideachta sin ina caidreamh le tríú páirtithe.
42 Maidir le comhthéacs na forála sin, ba cheart a thabhairt faoi deara go léiríonn roinnt forálacha de Threoir 2017/1132, amhail Airteagal 64(3) agus Airteagal 95(2) den Treoir sin, an t‑idirdhealú téarmaíochta a rinne reachtas an Aontais idir na comhlachtaí riaracháin agus bainistíochta, ar thaobh amháin, agus cruinniú ginearálta na scairshealbhóirí, ar an taobh eile. Dá bhrí sin, cé go bhfuil cumhachtaí cinnteoireachta áirithe ag an gcruinniú ginearálta sin, níl na cumhachtaí sin den chineál céanna leis na cumhachtaí a fheidhmíonn comhlachtaí riaracháin agus bainistíochta na cuideachta, agus mar thoradh air sin ní féidir gníomhartha an chruinnithe ghinearálta ná, tríd an gcruinniú sin, gníomhartha a chomhaltaí a aicmiú mar ‘rannpháirtíocht’ de réir bhrí Airteagal 14(d)(ii) den Treoir sin.
43 Thairis sin, cé go gceanglaítear le hAirteagal 14(a) de Threoir 2017/1132, nach mór a léamh i gcomhar le hAirteagal 4(i) di, go bhfoilseofar ionstraim chomhdhéanaimh agus airteagail chomhlachais cuideachta poiblí faoi dhliteanas teoranta, ós rud é nach mór céannacht a sínitheoirí a lua sna doiciméid sin, a fhéadfaidh scairshealbhóirí tosaigh na cuideachta sin a áireamh iontu, ní cheanglaítear go sainráite le haon fhoráil den Treoir sin go bhfoilseofar iad i gcás athrú ina dhiaidh sin ar chomhdhéanamh scairshealbhóirí cuideachta den sórt sin.
44 Maidir leis na cuspóirí a shaothraítear le Treoir 2017/1132, leanann sé ó aithrisí 7 agus 8 agus ó Airteagal 1 den Treoir sin go bhfuil sé beartaithe leis an nochtadh dá bhforáiltear inti, inter alia, leasanna tríú páirtithe a chosaint i ndáil le cuideachtaí faoi theorainn scaireanna agus cuideachtaí príobháideacha faoi dhliteanas teoranta, ós rud é nach dtairgeann siad ach a sócmhainní mar shlándáil i leith tríú páirtithe. Chuige sin, ní mór don nochtadh sin a chur ar chumas tríú páirtithe doiciméid bhunriachtanacha na cuideachta lena mbaineann agus faisnéis áirithe a bhaineann léi a bheith ar eolas acu, go háirithe céannacht na ndaoine atá údaraithe chun ceangal a chur uirthi (féach, chuige sin, breithiúnas an 4 Deireadh Fómhair 2024, Agentsia po vpisvaniyata, C‑200/23, EU:C:2024:827, mír 77).
45 Ina theannta sin, is é is aidhm don Treoir sin deimhneacht dhlíthiúil a áirithiú sa chaidreamh idir cuideachtaí agus tríú páirtithe d’fhonn an sreabhadh gnó idir na Ballstáit a mhéadú mar thoradh ar chruthú an mhargaidh inmheánaigh. Ón taobh sin de, tá sé tábhachtach go mbeadh aon duine ar mian leis caidreamh gnó a bhunú agus a shaothrú le cuideachtaí atá lonnaithe i mBallstáit eile in ann eolas a chur go héasca ar an bhfaisnéis bhunriachtanach a bhaineann le foirmiú cuideachtaí tráchtála agus ar chumhachtaí na ndaoine atá freagrach as ionadaíocht a dhéanamh orthu, lena gceanglaítear go n‑áireofar an fhaisnéis ábhartha go léir go sainráite sa chlár dá dtagraítear in Airteagal 16(3) den Treoir sin (féach, chuige sin, breithiúnas an 4 Deireadh Fómhair 2024, Agentsia po vpisvaniyata, C‑200/23, EU:C:2024:827, mír 78 agus an cásdlí dá dtagraítear).
46 Sa chás seo, is cosúil nach bhfuil foilsiú sonraí a bhaineann le scairshealbhóirí uile cuideachtaí poiblí faoi dhliteanas teoranta agus, go háirithe, le scairshealbhóirí mionlaigh na gcuideachtaí sin úsáideach i bhfianaise an chuspóra leasanna tríú páirtithe agus deimhneacht dhlíthiúil a chosaint, agus dá bhrí sin, nach féidir údar maith a thabhairt leis an gcuspóir sin. Ós rud é nach bhfuil scairshealbhóirí mionlaigh i dteideal, i bprionsabal, ionadaíocht a dhéanamh ar chuideachta phoiblí theoranta, ná í a cheangal i ndáil le tríú páirtithe, ná feidhmeanna bainistíochta agus maoirseachta a chomhlíonadh, murab ionann agus comhaltaí chomhlachtaí riaracháin agus bainistíochta cuideachta den sórt sin, is cosúil nach mbaineann na sonraí a bhaineann leis na scairshealbhóirí sin go léir le hábhar do na tríú páirtithe sin.
47 Dá bhrí sin, is é an freagra ar an gcéad cheist nach mór Airteagal 14(d) de Threoir 2017/1132 a léiriú sa chaoi nach gceanglaítear leis faisnéis a fhoilsiú a bhaineann le scairshealbhóirí uile na gcuideachtaí a chumhdaítear leis an bhforáil sin, lena n‑áirítear scairshealbhóirí mionlaigh na gcuideachtaí sin.
An dara ceist
48 I bhfianaise an fhreagra arna thabhairt ar an gcéad cheist, níl gá freagra a thabhairt ar an dara ceist.
An tríú agus an ceathrú ceist
49 Leis an tríú agus an ceathrú ceist, arb iomchuí déileáil leo le chéile, fiafraíonn an chúirt a rinne an tarchur, go bunúsach, an gá Airteagail 5 agus 6 de RGCS, arna léamh i bhfianaise Airteagail 7 agus 8 den Chairt, a léiriú sa chaoi go gcuirtear cosc leo ar reachtaíocht náisiúnta lena gceanglaítear sonraí pearsanta a chur ar fáil don phobal a bhaineann le gach scairshealbhóir, lena n‑áirítear scairshealbhóirí mionlaigh, de chuideachtaí poiblí faoi dhliteanas teoranta, a bhaineann le céannacht gach ceann de na scairshealbhóirí sin, a shonraí teagmhála, catagóir, líon agus luach ainmniúil na scaireanna atá aige agus líon na vótaí a ghabhann leis na scaireanna sin, chun timpeallacht ghnó thrédhearcach a áirithiú chun leasanna tríú páirtithe a chosaint, chun sciúradh airgid agus maoiniú sceimhlitheoireachta agus leathadh arm ollscriosta a chosc, agus chun an fhaisnéis is gá a sholáthar chun smachtbhannaí náisiúnta, idirnáisiúnta agus de chuid an Aontais a chur chun feidhme, i gcás nach bhfuil rochtain ar na sonraí sin faoi réir aon choinníoll, amhail leas dlisteanach a léiriú.
50 Mar réamhphointe, ba cheart a mheabhrú, i gcomhréir leis an gcuspóir atá á shaothrú ag RGCS, mar is léir ó Airteagal 1 agus aithrisí 1 agus 10 de, arb é atá ann, inter alia, ardleibhéal cosanta a áirithiú do chearta agus saoirsí bunúsacha daoine nádúrtha, go háirithe a gceart chun príobháideachais maidir le próiseáil sonraí pearsanta, a chumhdaítear in Airteagal 8(1) den Chairt agus in Airteagal 16(1) CFAE, nach mór d’aon phróiseáil sonraí pearsanta, inter alia, na prionsabail a bhaineann le próiseáil sonraí den sórt sin a leagtar amach in Airteagal 5 de RGCS a chomhlíonadh agus na coinníollacha dlíthiúlachta a liostaítear in Airteagal 6 de a chomhlíonadh (féach, chuige sin, breithiúnais an 9 Eanáir 2025, Mousse, C‑394/23, EU:C:2025:2, míreanna 21 agus 22, agus an 3 Aibreán 2025, Ministerstvo zdravotnictví (Sonraí a bhaineann le hionadaí duine dhlítheanaigh), C‑710/23, EU:C:2025:231, míreanna 29 agus 33).
51 I ndáil leis sin, ba cheart a thabhairt faoi deara go bhforáiltear le hAirteagal 5(1)(a) de RGCS nach mór sonraí pearsanta a phróiseáil ar bhealach dleathach, cothrom agus trédhearcach i ndáil leis an ábhar sonraí.
52 Ina theannta sin, faoi Airteagal 5(1)(b) de RGCS, lena leagtar síos prionsabal an teorannaithe de réir cuspóra ar phróiseáil sonraí pearsanta, ní mór, ar thaobh amháin, sonraí den sórt sin a bhailiú chun críoch sonraithe, sainráite agus dlisteanach agus, ar an taobh eile, ní mór gan tuilleadh próiseála a dhéanamh orthu ar bhealach atá ar neamhréir leis na críocha sin. De réir an chásdlí, tugtar le tuiscint leis an bprionsabal sin, go háirithe, ar an gcéad dul síos, nach mór críocha na próiseála a shainaithint tráth a bhailítear na sonraí pearsanta ar a dhéanaí, ansin, nach mór críocha na próiseála sin a shonrú go soiléir agus, ar deireadh, nach mór do chuspóirí na próiseála sin dlíthiúlacht phróiseáil na sonraí sin a ráthú, go háirithe, de réir bhrí Airteagal 6(1) de RGCS (féach, chuige sin, breithiúnas an 20 Deireadh Fómhair 2022, Digi, C‑77/21, EU:C:2022:805, mír 27 agus an cásdlí dá dtagraítear).
53 Ar deireadh, faoi Airteagal 5(1)(c) de RGCS, lena gcumhdaítear prionsabal an íoslaghdaithe sonraí, ní mór na sonraí sin a bheith leordhóthanach, ábhartha agus teoranta don mhéid is gá chun na gcríoch ar chucu a dhéantar iad a phróiseáil. Is léiriú é an prionsabal sin ar phrionsabal na comhréireachta (féach, chuige sin, breithiúnas an 9 Eanáir 2025, Mousse, C‑394/23, EU:C:2025:2, mír 24 agus an cásdlí dá dtagraítear).
54 Maidir leis na coinníollacha a bhaineann le próiseáil dhleathach, soláthraítear leis an gcéad fhomhír d’Airteagal 6(1) de RGCS liosta uileghabhálach agus sriantach de na cásanna ina bhféadfar a mheas go bhfuil próiseáil sonraí pearsanta dleathach. Dá bhrí sin, chun a mheas go bhfuil próiseáil dlisteanach, ní mór di teacht faoi cheann de na cásanna dá bhforáiltear san fhoráil sin (féach, chuige sin, breithiúnas an 9 Eanáir 2025, Mousse, C‑394/23, EU:C:2025:2, mír 25 agus an cásdlí dá dtagraítear).
55 Faoi phointe (a) den chéad fhomhír d’Airteagal 6(1) de RGCS, tá próiseáil sonraí pearsanta dleathach má tá, agus a mhéid atá, toiliú tugtha ag an ábhar sonraí chun ceann amháin nó níos mó de chríocha sonracha. In éagmais toiliú den sórt sin, nó i gcás nár tugadh an toiliú sin faoi shaoirse, sonrach, feasach agus gan athbhrí, de réir bhrí phointe 11 d’Airteagal 4 de RGCS, féadfar údar a thabhairt le próiseáil den sórt sin mar sin féin i gcás ina gcomhlíonann sí ceann de na ceanglais riachtanais dá dtagraítear i bpointí (b) go (f) den chéad fhomhír d’Airteagal 6(1) de RGCS. Sa chomhthéacs sin, ní mór na húdair dá bhforáiltear san fhoráil dheireanach sin, a mhéid a fhágann siad gur féidir próiseáil sonraí pearsanta a dhéantar in éagmais toiliú ón ábhar sonraí a dhéanamh dleathach, a léiriú go sriantach (breithiúnas an 9 Eanáir 2025, Mousse, C‑394/23, EU:C:2025:2, míreanna 26 agus 27 agus an cásdlí dá dtagraítear).
56 Thairis sin, de réir an chásdlí, i gcás inar féidir a chinneadh go bhfuil gá le sonraí pearsanta a phróiseáil i bhfianaise ceann de na húdair dá bhforáiltear i bpointí (b) go (f) den chéad fhomhír d’Airteagal 6(1) de RGCS, ní gá a chinneadh an dtagann an phróiseáil sin faoi raon feidhme ceann eile de na húdair sin freisin (breithiúnas an 9 Eanáir 2025, Mousse, C‑394/23, EU:C:2025:2, mír 28 agus an cásdlí dá dtagraítear.
57 Sa chás seo, tá comhthuiscint ann go mbaineann an fhaisnéis atá i gceist sa díospóid sna príomhimeachtaí le daoine nádúrtha sainaitheanta nó in‑sainaitheanta agus, dá bhrí sin, nach mór í a aicmiú mar shonraí pearsanta de réir bhrí Airteagal 4(1) de RGCS. Tá comhthuiscint ann freisin go ndéantar an fhaisnéis sin a phróiseáil, de réir bhrí Airteagal 4(2) de RGCS, a mhéid a chuirtear ar fáil don phobal í, agus go dtagann an phróiseáil sin, atá uathoibrithe, faoi raon feidhme ábhartha RGCS, de bhun Airteagal 2(1) de.
58 Ina theannta sin, mar a thug an tAbhcóide Ginearálta faoi deara, go bunúsach, i mír 43 dá Thuairim, ceanglaítear próiseáil na sonraí atá i gceist sna príomhimeachtaí leis an reachtaíocht náisiúnta agus, dá bhrí sin, ní mór scrúdú a dhéanamh uirthi i bhfianaise phointe (c) den chéad fhomhír d’Airteagal 6(1) de RGCS, ar dá réir atá próiseáil dleathach más rud é agus a mhéid atá sí ‘riachtanach chun oibleagáid dhlíthiúil a bhfuil an rialaitheoir faoina réir a chomhlíonadh’.
59 Sonraítear in Airteagal 6(3) de RGCS, inter alia, i gcás den sórt sin, nach mór an phróiseáil a bheith bunaithe ar dhlí an Aontais nó ar dhlí Ballstáit a bhfuil an rialaitheoir faoina réir, agus nach mór críocha na próiseála a shainiú sa bhunús dlí sin. Ní mór dó cuspóir a bhaineann le leas an phobail a chomhlíonadh agus a bheith comhréireach leis an gcuspóir dlisteanach atá á shaothrú. Ós rud é gur léiriú iad na ceanglais sin ar na ceanglais a eascraíonn as Airteagal 52(1) den Chairt, ní mór iad a léiriú i bhfianaise na forála deiridh sin (féach, chuige sin, breithiúnais an 1 Lúnasa 2022, Vyriausioji tarnybinės etikos komisija, C‑184/20, EU:C:2022:601, mír 69, agus an 4 Deireadh Fómhair 2024, Agentsia po vpisvaniyata, C‑200/23, EU:C:2024:827, mír 104).
60 I ndáil leis sin, ba cheart a thabhairt faoi deara nach sainchearta iomlána iad na cearta bunúsacha maidir le hurraim don saol príobháideach agus maidir le cosaint sonraí pearsanta, a ráthaítear in Airteagail 7 agus 8 den Chairt, ach nach mór iad a mheas i ndáil lena bhfeidhm sa tsochaí agus iad a chothromú i gcoinne cearta bunúsacha eile. Dá bhrí sin, féadfar teorainneacha a fhorchur, ar choinníoll, i gcomhréir le hAirteagal 52(1) den Chairt, go bhforáiltear dóibh le dlí agus go n‑urramaíonn siad bunbhrí na gceart bunúsach agus prionsabal na comhréireachta (breithiúnais an 22 Meitheamh 2021, Latvijas Republikas Saeima (Pointí pionóis), C‑439/19, EU:C:2021:504, mír 105; an 1 Lúnasa 2022, Vyriausioji tarnybinės etikos komisija, C‑184/20, EU:C:2022:601, mír 70, agus an 4 Deireadh Fómhair 2024, Bezirkshauptmannschaft Landeck (Iarracht rochtain a fháil ar shonraí pearsanta arna stóráil ar fhón póca), C‑548/21, EU:C:2024:830, mír 85 agus an cásdlí dá dtagraítear).
61 Sa chomhthéacs sin, ba cheart a mheabhrú, de réir cásdlí socair, go gceanglaítear le comhréireacht beart as a n‑eascraíonn cur isteach ar na cearta a ráthaítear in Airteagail 7 agus 8 den Chairt go gcomhlíonfar na ceanglais maidir le hoiriúnacht, riachtanas agus comhréireacht na mbeart sin i ndáil leis an gcuspóir atá á shaothrú (an breithiúnas in Luxembourg Business Registers, mír 63 agus an cásdlí dá dtagraítear).
62 Go sonrach, níl feidhm ag maoluithe ó chosaint sonraí pearsanta ná ag teorainneacha léi ach amháin a mhéid a bhfuil fíorghá leis, ar an tuiscint, i gcás ina bhfuil rogha idir roinnt beart atá iomchuí chun na cuspóirí dlisteanacha atá á saothrú a bhaint amach, nach mór dul ar iontaoibh an bhirt lena mbaineann an t‑ualach is éadroime. Thairis sin, ní féidir cuspóir leasa ghinearálta a shaothrú gan a chur san áireamh nach mór é a réiteach leis na cearta bunúsacha lena mbaineann an beart a roghnaíodh, trí chothromaíocht a bhaint amach idir, ar thaobh amháin, cuspóir an leasa ghinearálta agus, ar an taobh eile, na cearta atá i gceist, chun a áirithiú nach mbeidh na míbhuntáistí a eascraíonn as an mbeart sin díréireach leis na haidhmeanna atá á saothrú. Dá bhrí sin, ní mór measúnú a dhéanamh ar an bhféidearthacht údar a thabhairt le teorannú ar na cearta a ráthaítear in Airteagail 7 agus 8 den Chairt trí thromchúis an chur isteach a bhaineann le teorannú den sórt sin a thomhas agus trína fhíorú go bhfuil tábhacht chuspóir an leasa ghinearálta a shaothraítear leis an teorannú sin i gcomhréir leis an tromchúis sin (an breithiúnas in Luxembourg Business Registers, mír 64 agus an cásdlí dá dtagraítear).
63 Ina theannta sin, chun ceanglas na comhréireachta a chomhlíonadh, ní mór don reachtaíocht atá i gceist leis an gcur isteach rialacha soiléire agus beachta a leagan síos freisin lena rialaítear raon feidhme agus cur i bhfeidhm na mbeart a leagtar síos inti agus lena bhforchuirtear coimircí íosta, ionas go mbeidh ráthaíochtaí leordhóthanacha ag na hábhair sonraí chun a sonraí pearsanta a chosaint go héifeachtach ar an mbaol mí-úsáide. Ní mór dó, go háirithe, a chur in iúl cad iad na himthosca agus na coinníollacha faoina bhféadfar beart a dhéanamh lena bhforáiltear do phróiseáil sonraí den sórt sin, agus ar an gcaoi sin a áirithiú go bhfuil an cur isteach teoranta don mhéid atá fíor-riachtanach (féach, chuige sin, an breithiúnas in Luxembourg Business Registers, mír 65 agus an cásdlí dá dtagraítear).
64 Sa chás seo, is faoin gcúirt a rinne an tarchur atá sé a fháil amach, sa chéad áit, an gcomhlíonann an reachtaíocht náisiúnta atá i gceist sna príomhimeachtaí prionsabal an teorannaithe de réir cuspóra, a leagtar amach in Airteagal 5(1)(b) de RGCS, i bhfianaise an chásdlí dá dtagraítear i mír 52 den bhreithiúnas seo, agus an sainítear críocha na próiseála sa bhunús dlí ábhartha, de réir bhrí Airteagal 6(3) de RGCS. Mar a thug an tAbhcóide Ginearálta faoi deara i mír 45 dá Thuairim, i ndáil leis sin, tá sé tábhachtach gur féidir an chríoch nó na críocha atá i gceist a shainiú le deimhneacht leordhóthanach i bhfianaise fhoclaíocht na reachtaíochta lena mbaineann nó i bhfianaise an chomhthéacs reachtaigh ar cuid de í.
65 Sa dara háit, is gá a fháil amach an gcomhlíonann an bunús dlí sin na ceanglais eile a eascraíonn as Airteagal 6(3) de RGCS agus Airteagal 52(1) den Chairt, i bhfianaise an chásdlí shocair dá dtagraítear i míreanna 59 go 63 den bhreithiúnas seo agus tromchúis an chur isteach ar na cearta a ráthaítear le hAirteagail 7 agus 8 den Chairt a eascraíonn as an mbunús dlí sin á cur san áireamh.
66 Cé gur faoin gcúirt a rinne an tarchur atá sé ar deireadh a chinneadh an gcomhlíontar na ceanglais eile sin, is faoin gCúirt atá sé, agus réamhrialú á thabhairt aici, na heilimintí léirithe uile ar dhlí an Aontais a d’fhéadfadh a bheith ina gcúnamh le linn breithniú a dhéanamh ar an gcás atá ar feitheamh os a comhair a chur ar fáil don chúirt sin agus soiléiriú a thabhairt, i gcás inarb iomchuí, atá ceaptha chun treoir a thabhairt di agus scrúdú á dhéanamh aici (féach, chuige sin, breithiúnais an 27 Meitheamh 2017, Congregación de Escuelas Pías Provincia Betania, C‑74/16, EU:C:2017:496, mír 36 agus an cásdlí dá dtagraítear, agus an 9 Eanáir 2025, Mousse, C‑394/23, EU:C:2025:2, mír 51).
67 I ndáil leis sin, mar is léir ó chásdlí socair na Cúirte, is ionann sonraí pearsanta a chur in iúl do thríú páirtithe, lena n‑áirítear sonraí den sórt sin a chur ar fáil, agus cur isteach ar na cearta bunúsacha a chumhdaítear in Airteagail 7 agus 8 den Chairt, gan beann ar úsáid na faisnéise a chuirtear in iúl ina dhiaidh sin. I ndáil leis sin, ní bhaineann sé le hábhar cé acu atá nó nach bhfuil an fhaisnéis a bhaineann leis an saol príobháideach lena mbaineann íogair nó cé acu a d’fhulaing nó nár fhulaing na daoine lena mbaineann aon mhíchaoithiúlacht mar thoradh ar an gcur isteach sin (féach, chuige sin, breithiúnas an 21 Meitheamh 2022, Ligue des droits humains, C‑817/19, EU:C:2022:491, mír 96, agus an breithiúnas in Luxembourg Business Registers, mír 39).
68 Sa chás seo, cé go liostaítear go sonrach sa reachtaíocht náisiúnta atá i gceist sna príomhimeachtaí na sonraí pearsanta nach mór a chur ar fáil don phobal, agus mar thoradh air sin go bhforáiltear leis an dlí don chur isteach a eascraíonn as sin, is gá fós, ar an gcéad dul síos, tromchúis an chur isteach sin a thomhas agus, ar an dara dul síos, scrúdú a dhéanamh an bhfuil tábhacht na gcuspóirí leasa ghinearálta a líomhnaítear atá á saothrú comhréireach leis an tromchúis sin (féach, chuige sin, breithiúnas an 1 Lúnasa 2022, Vyriausioji tarnybinės etikos komisija, C‑184/20, EU:C:2022:601, mír 98).
69 Dá bhrí sin, ar an gcéad dul síos, maidir le tromchúis cur isteach den sórt sin, ní mór a chur san áireamh, go háirithe, cineál na sonraí pearsanta atá i gceist, a d’fhéadfadh a bheith íogair, chomh maith le cineál phróiseáil na sonraí atá i gceist agus na socruithe praiticiúla chun é sin a dhéanamh, go háirithe líon na ndaoine a bhfuil rochtain acu ar na sonraí sin agus na socruithe chun rochtain a fháil orthu (breithiúnas an 1 Lúnasa 2022, Vyriausioji tarnybinės etikos komisija, C‑184/20, EU:C:2022:601, mír 99 agus an cásdlí dá dtagraítear).
70 Sa chás seo, ba cheart a thabhairt faoi deara, a mhéid a bhaineann na sonraí a chuirtear ar fáil don phobal go háirithe le céannacht gach scairshealbhóra, a shonraí teagmhála, aicme, líon agus luach ainmniúil na scaireanna atá aige agus líon na vótaí a ghabhann leis na scaireanna sin, go bhféadfadh na sonraí sin próifíl a tharraingt suas a bhaineann, inter alia, le staid rachmais an duine lena mbaineann agus leis na hearnálacha eacnamaíocha agus na gnóthais shonracha ina ndéanann sé infheistíocht (féach, chuige sin, an breithiúnas in Luxembourg Business Registers, mír 41).
71 Ina theannta sin, is gné dhílis de chur ar fáil den sórt sin go mbeidh rochtain ar na sonraí sin ag líon daoine a d’fhéadfadh a bheith neamhtheoranta, agus mar thoradh air sin gur dócha go gcuirfidh a bpróiseáil ar chumas daoine a fhéachann, ar chúiseanna nach mbaineann leis an gcuspóir atá á shaothrú leis an gcur ar fáil sin, le faisnéis a fháil faoi staid ábhartha agus airgeadais scairshealbhóra den sórt sin, saor-rochtain a fháil ar na sonraí sin. Tá an fhéidearthacht sin níos éasca fós i gcás inar féidir sonraí den sórt sin a cheadú ar an idirlíon (féach, chuige sin, an breithiúnas in Luxembourg Business Registers, mír 42 agus an cásdlí dá dtagraítear).
72 Ina theannta sin, is measa fós na hiarmhairtí a d’fhéadfadh a bheith ann do na hábhair sonraí mar thoradh ar aon mhí-úsáid a bhaintear as a gcuid sonraí ós rud é, a luaithe a chuirfear na sonraí sin ar fáil don phobal, nach amháin go bhféadfar iad a cheadú gan bhac, ach go bhféadfar iad a choinneáil agus a scaipeadh freisin agus, i gcás próiseáil chomhleanúnach den sórt sin, go n‑éiríonn sé níos deacra, nó fiú meabhlach, do na hábhair sonraí sin iad féin a chosaint go héifeachtach ar mhí-úsáid (féach, chuige sin, an breithiúnas in Luxembourg Business Registers, mír 43).
73 Dá bhrí sin, cé nach ndéanann sé dochar do bhunbhrí na gceart a ráthaítear le hAirteagail 7 agus 8 den Chairt, is ionann na sonraí atá i gceist sna príomhimeachtaí a chur ar fáil don phobal, mar sin féin, agus cur isteach tromchúiseach ar na cearta sin in aon chás (féach, chuige sin, an breithiúnas in Luxembourg Business Registers, míreanna 44 agus 54).
74 Ar an taobh eile, mar a thug an tAbhcóide Ginearálta faoi deara i míreanna 50 go 52 dá Thuairim, ní mór a mheas go bhféadfar na cuspóirí a chuir Parlaimint na Laitvia chun cinn os comhair na cúirte a rinne an tarchur chun údar a thabhairt leis an mbeart dá bhforáiltear leis an reachtaíocht náisiúnta atá i gceist sna príomhimeachtaí agus a mheabhraítear i mír 49 den bhreithiúnas seo a aicmiú mar chuspóirí leasa ghinearálta arna n‑aithint ag an Aontas. Is gá, áfach, scrúdú a dhéanamh an gcomhlíonann reachtaíocht náisiúnta amhail an reachtaíocht atá i gceist sna príomhimeachtaí na ceanglais maidir le hoiriúnacht agus riachtanas, chomh maith leis an reachtaíocht sin a bhaineann le comhréireacht an bhirt sin i ndáil leis na cuspóirí atá á saothrú, de réir bhrí mhír 61 den bhreithiúnas seo.
75 Maidir leis an gcuspóir leasa ghinearálta arb é atá ann timpeallacht thrédhearcach ghnó a áirithiú chun leasanna tríú páirtithe a chosaint, ba cheart a thabhairt faoi deara go ndealraíonn sé, go bunúsach, go bhfreagraíonn an cuspóir sin don chuspóir atá á shaothrú le comhordú na bhforálacha náisiúnta in Airteagal 14(d) de Threoir 2017/1132, arna léamh i bhfianaise aithrisí 7 agus 8 de.
76 Mar is léir ó mhír 46 den bhreithiúnas seo, is cosúil nach bhfuil aon chuspóir úsáideach ag nochtadh sonraí a bhaineann le scairshealbhóirí uile cuideachta poiblí faoi dhliteanas teoranta agus, go háirithe, lena scairshealbhóirí mionlaigh i bhfianaise an chuspóra sin. Dá bhrí sin, is cosúil nach bhfuil reachtaíocht náisiúnta amhail an reachtaíocht atá i gceist sna príomhimeachtaí iomchuí ná riachtanach chun an cuspóir sin a bhaint amach agus, dá bhrí sin, ní féidir léi údar a thabhairt leis an gcur isteach tromchúiseach ar na cearta a ráthaítear le hAirteagail 7 agus 8 den Chairt, dá dtagraítear i mír 73 den bhreithiúnas seo.
77 Maidir leis an gcuspóir leasa ghinearálta arb é atá ann sciúradh airgid agus maoiniú sceimhlitheoireachta agus leathadh arm ollscriosta a chosc, ní mór a mheas go bhféadfadh rochtain phoiblí ar na sonraí lena mbaineann rannchuidiú leis an gcuspóir sin a bhaint amach, ós rud é go rannchuidíonn cineál poiblí na rochtana sin agus an trédhearcacht mhéadaithe a eascraíonn as sin le timpeallacht a chruthú ar lú an dóchúlacht go n-úsáidfear í chun na gcríoch sin (féach, chuige sin, an breithiúnas in Luxembourg Business Registers, mír 67).
78 Mar sin féin, ní féidir a mheas go bhfuil géarghá le rochtain den sórt sin i gcás inar féidir an cuspóir sin a bhaint amach go réasúnta chomh héifeachtach céanna ar bhealaí eile, ar bhealach nach ndéanann dochar do na cearta a ráthaítear le hAirteagail 7 agus 8 den Chairt (féach, chuige sin, breithiúnas an 4 Deireadh Fómhair 2024, Bezirkshauptmannschaft Landeck (Iarracht rochtain a fháil ar shonraí pearsanta arna stóráil ar fhón póca), C‑548/21, EU:C:2024:830, mír 87).
79 Is tosaíocht do na húdaráis phoiblí agus d’eintitis amhail institiúidí creidmheasa nó airgeadais atá, mar gheall ar a ngníomhaíochtaí, faoi réir oibleagáidí sonracha ina leith sin é sciúradh airgid agus maoiniú sceimhlitheoireachta agus leathadh arm ollscriosta a chomhrac (an breithiúnas in Luxembourg Business Registers, mír 83), amhail iad siúd a eascraíonn, go háirithe, as Airteagail 11 agus 13 de Threoir 2015/849.
80 Sa chomhthéacs sin, ba cheart a thabhairt faoi deara go bhforáiltear le hAirteagal 30(5) de Threoir 2015/849, a n-eascraíonn a fhoclaíocht as Airteagal 74(1) de Threoir 2024/1640, nach mór do na Ballstáit a áirithiú go mbeidh rochtain ar fhaisnéis maidir le húinéirí tairbhiúla, de réir bhrí na forála sin, i ngach cás, go háirithe, ‘d’aon duine nó d’aon eagraíocht ar féidir leo leas dlisteanach a léiriú’, agus ní don phobal ina iomláine.
81 I ndáil leis sin, ba cheart a thabhairt faoi deara freisin, de réir chásdlí na Cúirte, go bhféadfadh reachtaíocht lena gceadaítear, chun an cuspóir dá dtagraítear i mír 77 den bhreithiúnas seo a shaothrú, rochtain a bheith ag daoine den phobal ar féidir leo leas dlisteanach a léiriú ar shonraí pearsanta, i bprionsabal, an cur isteach ar na cearta a ráthaítear in Airteagail 7 agus 8 den Chairt a theorannú don mhéid a bhfuil fíorghá leis (féach, chuige sin, breithiúnas an 21 Bealtaine 2026, Across Fiduciaria agus páirtithe eile, C‑684/24 agus C‑685/24, EU:C:2026:410, mír 106).
82 Sa chás seo, maidir le scairshealbhóirí mionlaigh nach bhfuil stádas úinéirí tairbhiúla na cuideachta ina bhfuil cuid den scairchaipiteal acu, ní cosúil, a fortiori, go bhfuil géarghá leis go mbeadh rochtain ag aon duine ar shonraí pearsanta amhail na sonraí atá i gceist sna príomhimeachtaí, gan iallach a bheith ar an duine sin leas dlisteanach a léiriú.
83 I gcomhthéacs den sórt sin, cé go sonraíonn an chúirt a rinne an tarchur go bhféadfadh sé nach mbeadh clár náisiúnta na ngnóthas, arb é an rialaitheoir é, in ann a fhíorú an bhfuil leas dlisteanach ag gach iarratasóir ar fhaisnéis maidir le rochtain a fháil ar na sonraí pearsanta lena mbaineann, ní mór a mheabhrú nach bhfuil aon deacrachtaí praiticiúla a bhaineann le fíorú go bhfuil leas dlisteanach ann de chineál a léiríonn go bhfuil fíorghá le cur isteach ar na cearta bunúsacha a ráthaítear leis an gCairt (féach, de réir analaí, breithiúnais an 26 Meán Fómhair 2000, an Coimisiún v an Ostair, C‑205/98, EU:C:2000:493, mír 78 agus an cásdlí dá dtagraítear, agus an 27 Samhain 2008, Papillon, C‑418/07, EU:C:2008:659, mír 54 agus an cásdlí dá dtagraítear).
84 Maidir leis an ngá atá le cothromaíocht chóir a bhaint amach idir, ar thaobh amháin, cuspóir an leasa ghinearálta atá á shaothrú agus, ar an taobh eile, na cearta bunúsacha atá i gceist, ba cheart a lua freisin, cé go bhféadfadh an comhrac i gcoinne sciúradh airgid agus mhaoiniú na sceimhlitheoireachta agus leathadh arm ollscriosta, go ginearálta, údar a thabhairt le cur isteach, fiú cur isteach tromchúiseach, ar na cearta sin (féach, chuige sin, breithiúnas in Luxembourg Business Registers, míreanna 58 agus 59), ní féidir tosaíocht a bheith ag an gcuspóir sin, sa chás seo, ar na cearta sin, ag féachaint do chineál agus do thromchúis an chur isteach a leagtar amach i mír 73 den bhreithiúnas seo.
85 Sa chomhthéacs sin, ba cheart a thabhairt faoi deara freisin nach bhfuil coimircí leordhóthanacha ag gabháil le reachtaíocht náisiúnta amhail an reachtaíocht atá i gceist sna príomhimeachtaí lena bhféadfaí na daoine lena mbaineann a chosaint go héifeachtach ar rioscaí mí-úsáide, de réir bhrí an chásdlí dá dtagraítear i mír 63 den bhreithiúnas seo. Tá rochtain ar a gcuid sonraí pearsanta ar an idirlíon agus is féidir iad a íoslódáil ar an mórchóir, go háirithe ag aon úsáideoir gan aithint, rud a mhéadaíonn na rioscaí sin.
86 Dá bhrí sin, is cosúil nach bhfuil reachtaíocht náisiúnta amhail an reachtaíocht atá i gceist sna príomhimeachtaí riachtanach ná comhréireach i ndáil leis an gcuspóir lena mbaineann, de réir bhrí mhír 61 den bhreithiúnas seo.
87 Ar deireadh, maidir le cuspóir leas an phobail an fhaisnéis is gá a sholáthar chun smachtbhannaí náisiúnta, idirnáisiúnta agus smachtbhannaí an Aontais a chur chun feidhme, tá reachtaíocht náisiúnta amhail an reachtaíocht atá i gceist sna príomhimeachtaí iomchuí freisin chun rannchuidiú le cur chun feidhme an chuspóra sin. Ba cheart a thabhairt faoi deara go n‑éascaíonn an trédhearcacht mhéadaithe a eascraíonn as an reachtaíocht sin an cur chun feidhme sin.
88 Mar sin féin, mar a thug an tAbhcóide Ginearálta faoi deara, go bunúsach, i míreanna 60 agus 61 dá Thuairim, is cosúil nach bhfuil géarghá le rochtain phoiblí ar na sonraí atá i gceist sa díospóid sna príomhimeachtaí chun na críche sin, ós rud é gur cosúil go bhfuil modhanna ar fáil nach ndéanann dochar do na cearta a ráthaítear le hAirteagail 7 agus 8 den Chairt.
89 Mar a chuir an Coimisiún in iúl ina bharúlacha i scríbhinn, d’fhéadfadh sé gurb é a bheadh i gceist le modh den sórt sin nach bhfuil chomh dochrach céanna, inter alia, srian a chur leis an oibleagáid gan faisnéis a fhoilsiú ach amháin maidir le sonraí a bhaineann le daoine atá ar liostaí smachtbhannaí agus rochtain ar shonraí a bhaineann le scairshealbhóirí nach bhfuil ar na liostaí sin a cheadú ach amháin do dhaoine atá in ann leas dlisteanach a léiriú ina leith sin.
90 Ina theannta sin, ar na cúiseanna céanna leo siúd dá dtagraítear, faoi seach, i míreanna 84 agus 85 den bhreithiúnas seo, ní féidir tosaíocht a bheith ag cuspóir leas an phobail atá á shaothrú, sa chás seo, ar na cearta bunúsacha atá i gceist agus ní áirítear le reachtaíocht náisiúnta amhail an reachtaíocht atá i gceist sna príomhimeachtaí coimircí leordhóthanacha lena bhféadfaí na daoine lena mbaineann a chosaint go héifeachtach ar na rioscaí mí-úsáide.
91 Mar sin, is cosúil nach bhfuil reachtaíocht den sórt sin riachtanach ná comhréireach i ndáil leis an gcuspóir lena mbaineann, de réir bhrí mhír 61 den bhreithiúnas seo.
92 Dá bhrí sin, i bhfianaise na mbreithnithe roimhe seo, is é an freagra ar an tríú agus ar an gceathrú ceist nach mór Airteagail 5 agus 6 de RGCS, arna léamh i bhfianaise Airteagail 7 agus 8 den Chairt, a léiriú sa chaoi go gcuirtear cosc leo ar reachtaíocht náisiúnta lena gceanglaítear sonraí pearsanta a bhaineann le scairshealbhóirí uile, lena n-áirítear scairshealbhóirí mionlaigh, cuideachtaí poiblí faoi dhliteanas teoranta a bhaineann le céannacht agus sonraí teagmhála gach scairshealbhóra, aicme, líon agus luach ainmniúil na scaireanna atá i seilbh an scairshealbhóra sin, agus líon na vótaí a ghabhann leis na scaireanna sin, a chur ar fáil don phobal chun timpeallacht ghnó thrédhearcach a áirithiú chun leasanna tríú páirtithe a chosaint, chun sciúradh airgid agus maoiniú sceimhlitheoireachta agus leathadh arm ollscriosta a chosc, agus chun an fhaisnéis is gá a sholáthar chun smachtbhannaí náisiúnta, idirnáisiúnta agus de chuid an Aontais a chur chun feidhme, i gcás nach bhfuil rochtain ar na sonraí sin faoi réir aon choinníollacha, amhail leas dlisteanach a léiriú.
Costais
93 Ós rud é, i gcás na bpáirtithe sna príomhimeachtaí, gur céim iad na himeachtaí sin sna himeachtaí atá ar feitheamh os comhair na cúirte a rinne an tarchur, is faoin gcúirt sin atá an cinneadh maidir le costais. Níl na costais a tabhaíodh trí bharúlacha a cuireadh faoi bhráid na Cúirte Breithiúnais, seachas costais na bpáirtithe sin, inghnóthaithe.
Ar na forais sin, rialaíonn an Chúirt (an Chéad Dlísheomra) mar seo a leanas:
1. Maidir le hAirteagal 14(d) de Threoir (AE) 2017/1132 ó Pharlaimint na hEorpa agus ón gComhairle an 14 Meitheamh 2017, maidir le gnéithe áirithe de dhlí na gcuideachtaí, arna leasú le Treoir (AE) 2019/1151 ó Pharlaimint na hEorpa agus ón gComhairle an 20 Meitheamh 2019,
ní mór léiriú a dhéanamh mar seo a leanas:
ní cheanglaítear leo faisnéis a nochtadh a bhaineann le scairshealbhóirí uile na gcuideachtaí a chumhdaítear leis an bhforáil sin, lena n-áirítear scairshealbhóirí mionlaigh na gcuideachtaí sin.
2. Maidir le hAirteagail 5 agus 6 de Rialachán (AE) 2016/679 ó Pharlaimint na hEorpa agus ón gComhairle an 27 Aibreán 2016 maidir le daoine nádúrtha a chosaint i ndáil le sonraí pearsanta a phróiseáil agus maidir le saorghluaiseacht sonraí den sórt sin, agus lena n-aisghairtear Treoir 95/46/CE (an Rialachán Ginearálta maidir le Cosaint Sonraí), arna léamh i bhfianaise Airteagail 7 agus 8 de Chairt um Chearta Bunúsacha an Aontais Eorpaigh,
ní mór léiriú a dhéanamh mar seo a leanas:
cuirtear cosc leis ar reachtaíocht náisiúnta lena gceanglaítear sonraí pearsanta a bhaineann le scairshealbhóirí uile, lena n-áirítear scairshealbhóirí mionlaigh, cuideachtaí poiblí faoi dhliteanas teoranta a bhaineann le céannacht agus sonraí teagmhála gach scairshealbhóra, aicme, líon agus luach ainmniúil na scaireanna atá i seilbh an scairshealbhóra sin, agus líon na vótaí a ghabhann leis na scaireanna sin, a chur ar fáil don phobal chun timpeallacht ghnó thrédhearcach a áirithiú chun leasanna tríú páirtithe a chosaint, sciúradh airgid agus maoiniú sceimhlitheoireachta agus leathadh arm ollscriosta a chosc, agus an fhaisnéis is gá a sholáthar chun smachtbhannaí náisiúnta, idirnáisiúnta agus an Aontais a chur chun feidhme, i gcás nach bhfuil rochtain ar na sonraí sin faoi réir aon choinníollacha, amhail leas dlisteanach a léiriú.
Sínithe
* Teanga an cháis: an Laitvis.
i Is ainm bréige é ainm an cháis seo. Ní fhreagraíonn sé d’fhíorainm aon pháirtí sna himeachtaí.